Nis takimi i Merkel me kryeministrat e gjashtë vendeve të Ballkanit Perëndimor

Kancelarja Angela Merkel mbërriti në hapësirat e “Tirana Business Park” për takimin me kryeministrat e gjashtë vendeve të Ballkanit Perëndimor.

---

Kryeministri i Shqipërisë, Edi Rama, kryeministri i Kosovës, Albin Kurti, ai i Maqedonisë së Veriut, Zoran Zaev, kryeministri i Bosnjës, Zoran Tegeltija dhe kryeministrja e Serbisë, Ana Bërnabiq dhe ai malazez Zdravko Krivokapiq tashmë kanë mbërritur para kohës se përcaktuar sipas protokollit shqiptar.

Po ashtu, do të ketë një foto familjare të kancelares Merkel me të gjithë kryeministrat e gjashtës së Ballkanit Perëndimor.

Ky takim zhvillohet para Samitit të radhës së vendeve të Ballkanit Perëndimor që do të mbahet më 6 tetor në Slloveni.

Temë bosht e këtij takimi është padyshim bashkëpunimi rajonal dhe Procesi i Berlinit, një iniciativë që është vlerësuar si urë lidhëse mes Ballkanit Perëndimor dhe Bashkimit Evropian.

Më shumë rreth këtij takimi pritet të mësojmë nga konferenca e kancelares Merkel me kryeministrin Rama e planifikuar rreth orës 14:30.

Në takim është edhe kryeministri i Kosovës Albin Kurti dhe ministrja e Punëve të Jashtme, Donika Gërvalla.