Përparim Gruda i Partisë Demokratike të Kosovës i ka bërë thirrje Qeverisë që Ligjin për Specialen ta dërgojë sa më shpejt për shqyrtim dhe miratim në Kuvend.
Sipas tij, koha në dispozicion është e kufizuar, pasi ekziston mundësia që legjislatura aktuale të shpërndahet brenda pak ditësh.
“Jemi këtu për të kërkuar nga Qeveria e Kosovës që sa më shpejt ta sjellë Ligjin për Specialen në Kuvend për miratim. Kanë mbetur pak ditë kur edhe mund të shpërndahet, me gjasë, ky Kuvend”, deklaroi Gruda.
Përfaqësuesi i PDK-së vlerësoi se Kuvendi nuk duhet ta përfundojë mandatin pa e trajtuar këtë nismë ligjore.
Ai e lidhi miratimin e ligjit me mbrojtjen e historisë së Kosovës dhe të Ushtrisë Çlirimtare të Kosovës, duke kërkuar angazhim të përbashkët të forcave politike.
“Nuk i falet skenës politike që një Kuvend që është i konstituuar të shpërbëhet pa trajtuar ndoshta ligjin më të rëndësishëm, për ta miratuar një ligj që mbron historinë e Kosovës. Është një ligj për mbrojtjen e Ushtrisë Çlirimtare të Kosovës dhe këtë duhet ta bëjmë bashkë”, tha ai.
