Organizata e Veteranëve të Luftës së Ushtrisë Çlirimtare të Kosovës (OVL-UÇK) ka paralajmëruar protestë gjithëpopullore nesër në orën 12:00, në sheshin “Skënderbeu” në Prishtinë, pas zhvillimeve të fundit në procesin gjyqësor ndaj drejtuesve të UÇK-së.
Gazmend Syla nga OVL-UÇK ka deklaruar se, sipas tij, zhvillimet e fundit kanë tentuar të vendosin në një balancë luftën e UÇK-së me ngjarjet e viteve 1998-1999.
“Dje dhe sot u ul lufta jonë për çlirim dhe u provua të bëhet një balancë mes asaj që ka ndodhur në luftën tonë në vitet ’98-’99. UÇK-ja nuk është kurrë ndërmarrje kriminale, kjo ishte rezistenca në kuptimin tonë përballë dëbimit, masakrave dhe e vetmja përgjigje e një kombi që ishte dënuar me zhdukje. Asnjë vendim nuk mund ta njollosë luftën tonë çlirimtare apo të barazojë ata që luftuan për liri”, deklaroi Syla.
Ai tha se organizatat e dala nga lufta e kanë konsideruar që nga fillimi Gjykatën Speciale si “politike” dhe procesin si të padrejtë, duke shtuar se, sipas tij, zhvillimet e fundit e kanë dëshmuar këtë qëndrim.
Syla bëri të ditur gjithashtu se organizatat e dala nga lufta planifikojnë hapa të tjerë, përfshirë krijimin e një këshilli koordinues kombëtar dhe një platforme ku do të përfshiheshin edhe shqiptarët jashtë Kosovës.
“Kësaj padrejtësie që iu bë drejtuesve të luftës së UÇK-së do t’i përgjigjemi me një iniciativë për krijimin e një këshilli koordinues kombëtar dhe të një platforme ku do të përfshihen edhe Shqipëria, por edhe shqiptarët e tjerë që jetojnë në viset e tjera, qoftë Mali i Zi, qoftë Lugina e Preshevës, por edhe nga mërgata jonë”, tha ai.
Sipas Sylës, do të kërkohet edhe hartimi i një strategjie kundërshtuese ndaj vendimit deri në përfundim të procesit të apelit, me përfshirjen e institucioneve të Kosovës, partive parlamentare, shoqërisë civile dhe institucioneve të tjera.
