Ministri i Jashtëm i Kosovës, Behgjet Pacolli, është takuar me presidentin e Guinesë Bissau, Jose Mario Vaz, të cilin e ka ftuar të vizitojë Kosovën.

Pacolli ka thënë se presidenti Jose Mario Vaz me dëshirë pranoi të fliste për vizitën në Kosovë, mirëpo kryediplomati kosovar shtoi se nuk i kanë zënë në gojë propaganda e Serbisë për tërheqjen e njohjes, shkruan Reporteri.net.

“Propagandat e hedhura nga ndonjë fqinj i Kosovës në kurriz të qëndrimit të shtetit të Guinesë Bissau, nuk ishin fare pjesë e diskutimit me presidentin Vaz, i cili pranoi me dëshirë ftesën për të vizituar Kosovën”, ka thënë Pacolli.

Ndërkaq, Pacolli ka potencuar se në takim është diskutuar për marrëdhëniet në mes të dyja vendeve, e po ashtu edhe për thellimin e bashkëpunimit diplomatik.

“Në takimin bilateral që zhvillova me presidentin e Guinesë Bissau, z.Jose Mario Vaz, folëm për rëndësinë e bashkëpunimit ndërmjet dy shteteve tona. Presidentit Vaz i shpreha falenderimet e mëdha të popullit të Kosovës për mbështetjen e tyre në secilën fazë të avansimit të shtetit tonë. Republika e Kosovës është e përkushtuar që të vendos dhe thellojë marëdhëniet diplomatike me çdo vend të botës andaj jam shumë i lumtur që në këtë drejtim jemi në rrugë të drejtë”, ka shtuar Pacolli.

Ndryshe, muaj më parë ministri i Jashtëm serb, Ivica Dacic, kishte thënë se Guinea Bissau ka tërhequr njohjen e Kosovës, por e cila gjë u mohua nga pala kosovare./Reporteri.net.