Presidentja Vjosa Osmani, ak reaguar pas aksidentit tragjik të një autobusi kosovar në Kroaci, ku dyshohet për 10 viktima e mbi 45 të lënduar.

Osmani në një postim në Facebook ka thënë se ky është një lajm tragjik e i rëndë për vendin tonë.

“Nga kontakti me Ambasadën e Kosovës në Zagreb dhe me autoritetet kroate, jam njoftuar se nga një aksident komunikacioni që ndodhi në Slavonski Brod të Kroacisë, kanë humbur jetën tragjikisht dhjetë udhëtarë e shumë të tjerë janë lënduar”, tha Osmani.

“Me zemër e me shpirt sot jemi me familjet që humbën më të dashurit në këtë tragjedi. Dhimbja është e papërshkrueshme e humbja shumë e madhe. Ngushëllime të sinqerta për të gjithë”, shkroi shefja e shtetit në Facebook.

Tutje, ajo tha se shteti i Kosovës do të jetë në krah të familjeve të atyre që humbën jetën, sikurse edhe të të lënduarve, të cilëve iu dëshiron shërim të shpejtë.

“Veprimet tona shtetërore do të jenë në funksion të lehtësimit të dhimbjes së familjeve që humbën më të dashurit e tyre, ndaj zyrtarë të institucioneve të Kosovës tashmë janë nisur për në Kroaci për t`u dalë në ndihmë qytetarëve tanë të përfshirë në këtë aksident tragjik”, tha Osmani.