Mëngjesi i së premtes nisi me lajme të kobshme në Kosovë, ku u shënuan tri vdekje tragjike.

Një 19 vjeçar në komunën e Gjilanit, u ther mbrëmë rreth mesnatës, ku si pasojë e lëndimeve të marra humbi jetën, shkruan Reporteri.net.

Prokuroria e Gjilanit ka dhënë detaje për vrasjen me thikë të 19 vjeçarit para banesës së tij.

Me anë të një komunikate për media, Prokuroria ka thënë se viktima është sulmuar me thikë pas mesnatës.

“Prokuroria Themelore në Gjilan, Departamenti për Krime të Rënda, ju njofton se më 23 Tetor 2020, pas mesnatës, në rrugën ‘’Gjon Sereqi’’ në Gjilan, dyshohet se një person i moshës 19 vjeçare është sulmuar me thikë, i cili për shkak të plagëve të marra ka ndërruar jetë”, thuhet në komunikatë.

Prokuroria ka thënë se i ndjeri E.S., fillimisht është dërguar për ndihmë mjekësore, në Emergjencën e Spitalit Regjional, në Gjilan, pastaj është transferuar në QKUK, në Prishtinë, ku edhe ka ndërruar jetë.

Me urdhër të prokurorit trupi i pa jetë i të ndjerit është dërguar për obduksion në Institutin e Mjekësisë Ligjore në Prishtinë dhe rasti është cilësuar si ‘’Vrasje e rëndë’’.

Lidhur me këtë çështje prokuroria në bashkëpunim me policinë janë duke ndërmarrë veprime hetimore, të cilat përfshijnë edhe intervistimin e familjarëve të të ndjerit dhe dëshmitarëve tjerë, me qëllim të ndriçimit të kësaj çështje penale