Albert Krasniqi është personi që ka mbetur i vrarë sot në Prishtinë, ndërsa i dyshuari i vrasjes është babai i tij.

Zëdhënësja e Prokurorisë Themelore në Prishtinë, Lauretë Ulaj, për Gazetën Express ka thënë se është ndaluar i dyshuari për vrasjen e Albert Krasniqit.

Trupi i pajetë është dërguar në Institutin e Mjekësisë Ligjore për obdukim.

“Lidhur me rastin ne fjale ju njoftojmë se prokurori kujdestar i Departamentit te Krimeve te Renda, ka dalë në vendin e ngjarjes. Rasti është cilësuar “Vrasje e rëndë”. Prokurori i Shtetit, ka ndaluar një të dyshuar për kryerjen e kësaj vepre penale. Trupi i pajetë është dërguar në Institutin e Mjekësisë Ligjore për obdukim.

Ne bashkëpunim me Policinë e Kosovës janë duke u ndërmarrë te gjitha veprimet e nevojshme hetimore, për zbulimin e rrethanave të kësaj ngjarje”, thuhet në përgjigjen e Ulajt.

Albert Krasniqi dyshohet se u vra nga babai i tij në garazhdën e ndërtesës ku banonin. Ngjarja ka ndodhur rreth orës 17:00 në rrugën “Ndue Perlleshi”, në Prishtinë.

Babai i tij, Skender Krasniqi tashmë i arrestuar, i është konfiskuar arma që dyshohet se është përdorur në këtë ngjarje.

Kujtojmë se i ndjeri Albert Krasniqi ishte bashkëshorti i ish-Miss Kosova, Besa Gashi, por që lidhja e tyre martesore përfundoi disa ditë më parë. Nga martesa e tyre ata kanë edhe një vajzë.