Prokuroria Themelore në Prishtina ka autorizuar Policinë që t’i nis hetimet lidhur me një incident që ka ndodhur më 24 prill 2020, në Telekomin e Kosovës gjatë mbajtjes së mbledhjes së Bordit të Telekomit të Kosovës.

Sipas Prokurorisë, Njësia e Hetimeve Rajonale në Prishtinë – kanë përcjellë një email (shënim zyrtar), nga Ministrja në detyrë e Ministrisë së Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike, Rozeta Hajdari lidhur me një incident që ka ndodhur më 24 prill 2020, në Telekomin e Kosovës gjatë mbajtjes së mbledhjes së Bordit të Telekomit të Kosovës.

Klan Kosova e ka kontaktuar zyrtaren për Informim të Prokurorisë, Laureta Ulaj, për të mësuar më shumë detaje rreth këtij rasti.

Ajo ka treguar se ministrja Hajdari e ka përpiluar një raport lidhur me atë se çfarë ka ndodhur në mbledhjen e Bordit të Telekomit të mbajtur me datë 24 prill 2020.

“Ministrja në detyrë e ka përpiluar një raport njoftues lidhur me atë se çfarë ka ndodhur në mbledhjen e bordit, të cilin raport ia ka përcjellë Policisë përmes e-mailit të saj. Të njëjtin e-mail Polica e ka dërguar në Prokurori dhe tashmë kanë filluar hetimet”.

Klan Kosova e ka kontaktuar edhe ish-kryeshefin e Telekomit, Bedri Istrefin, i cili thotë se ka publikuar një e-mail të ministres në fjalë, ku sipas tij, Hajdari iu ka bërë presion dhe shantazh zyrtarëve të lartë të Telekomit.

“Unë e kam publikuar e-mailin e ministres Rozeta Hajdari me datë 25 prill 2020, ku ajo iu adresohet me presion dhe shantazh zyrtarëve të lartë të Telekomit dhe në pozitën e ministres e përdorë autoritetin e saj në mënyrë të jashtëligjshme që të hapen zyrat e arkivit të Telekomit të Kosovës në mënyrë që t’i protokolojnë vendimet e jashtëligjshme që i kanë marrë në zyrat e saj me datë 24 prill 2020, ku merr vendim t’i shkarkojë zyrtarët e lartë të Telekomit”.