Një i ri i cili mbeti i plagosur rëndë nga shembja e një tende në stacionin hekurudhor në Novi Sad, ka ndërruar jetë pas katër muajsh e 20 ditësh luftë për jetën, duke u bërë viktima e 16-të e kësaj tragjedie që ka bërë që studentë dhe qytetarë në Serbi të protestojnë prej muajsh.

Fjala është për Vukashin Crnçeviqin, 18-vjeçarin e diplomuar në gjimnaz, i cili më 27 janar u transferua në Akademinë Mjekësore Ushtarake (MMA) nga Qendra Klinike Universitare e Vojvodinës, ku gjendja e tij ishte kritike, por stabile.

Të riun sot i kanë dhënë lamtumirën e fundit studentë dhe profesorë të Shkollës Ekonomike “Svetozar Miletic” në të cilën ai ka ndjekur, si dhe qytetarë të shumtë të Novi Sadit.

Një flamur i zi u shfaq në ndërtesën e shkollës dhe rrjetet sociale u mbushën me mesazhe ngushëllimi.

Në shenjë kujtimi, sot në disa lokacione të qytetit u mbajtën 16 minuta heshtje – një minutë për çdo viktimë të humbur të aksidentit tragjik.