Pas nënshkrimit të marrëveshjeve në kuadër të nismës “Open Balkan”, kryeministri shqiptar Edi Rama, presidenti serb Aleksandër Vuçiç dhe kryeministri i Maqedonisë së Veriut Zoran Zaev kanë dalë në një konferencë për media.

Presidenti serb, Aleksandar Vuçiq u shpreh i lumtur për marrëveshjet e nënshkruara, derisa tha se ky është kurorëzim i një pune dy vjeçare, shkruan Reporteri.net.

“Jam shumë i lumtur për marrëveshjet që nënshkruam sot. Ky është kurorëzimi i një pune për dy vite e gjysmë. Dëshiroj të them që kur erdha në Shqipëri e pashë që ju kundërvunë kryeministrit Rama për “Ballkanin e Hapur”, për ata që thonë se unë dua një Serbi më të madhe, apo që ka të bëjë me një Shqipëri të madhe. Nuk ka të bëjë as me njërën, as tjetrën”, tha Vuçiq.

Vuçiq i bëri thirrje edhe Kosovës, Malit të Zi e Bosnjës që të bëhen pjesë e kësaj nisme.

“Duke ardhur sot në Tiranë, dëshiroj të ju mirëpresim në Serbi, që Serbinë ta shihni si shtëpi të dytë, sepse edhe ne duam të ndihemi të tillë kur vijmë në Tiranë apo Shkup. Ne ritheksojmë ftesën tonë homologëve tanë në Kosovë, Podogricë e Bosnje, sepse ajo që dëshirojmë të bëjmë është që këto tri kryeqytete të bëhen pjesë e jona në këtë nismë”, u shpreh Vuçiq në konferencën për media”.