Pas nënshkrimit të 14 marrëveshjeve, kryeministrat Rama dhe Hoti, kanë dalë në një konferencë për media.

Kryeministri i Shqipërisë u shpreh se Shengeni rajonal është projekti i fëmijëve tanë, duke marrë në mbrojtje edhe një herë marrëveshjen dhe duke i bërë apel Kosovës që t’i bashkohet tashmë, kjo edhe pas kërkesë së SHBA-së.

“Më vjen mirë që sot jam posaçërisht me Avdullah Hotin, i cili me mençuri dhe kurajo ka zhbllokuar një proces të ngrirë dhe ka hequr një pengesë të vetvënë të Kosovës, duke i hapur rrugë vazhdimit të të vetmes vijë sjelljeje ndërkombëtare që Kosova ka të përcaktuar qysh në ditën e parë të lindjes së saj, dialogut dhe përkatësisë së patundur në familjen e madhe të vendeve që ishin kyçe në çlirimin e saj, në partneritet me BE-në dhe SHBA-të”, tha ai.

Kryeministri i Kosovës Avdullah Hoti, vlerësoi takimin e dy qeverive në Tiranë dhe marrëveshjet që u nënshkruan mes dy vendeve.