Kuvendi i Kosovës po mbanë seancë të veçantë plenare ku po diskutohet për personat me aftësi të kufizuara, seancë kjo e e thirrur nga deputeti i LDK-së, Fetah Rudi.

Pjesë e kësaj seance është edhe zv.kryeministri i Kosovës, Driton Selmanaj, i cili ishte paralajmëruar nga Lëvizja Vetëvendosje se nuk do të lihej të hynte më në sallën e seancave, pas deklaratës së tij lidhur me personat e pagjetur, ku opozita e akuzon se ka thënë se kjo temë është ezauruar, çka e mohon numri dy i qeverisë.

Për pjesëmarrjen e Selmanajt në Kuvend, ka reaguar edhe deputetja Saranda Bogujevci e cila e ka quajtur të paftyrë zëvendëskryeministrin.

Bogujevci ka thënë se Selmanaj po e shfrytëzon seancën ku po diskutohet për persona me nevoja të veçanta për të qenë i pranishëm në sallën plenare të Kuvendit.

“Ky njeri nuk ka as fytyre e as dinjitet. Shfrytëzon seancën ku po diskutohet për persona me nevoja të veçanta për të qenë i pranishëm në sallën plenare të Kuvendit.
Nuk mund të kuptoj se si nuk e di kur është mjaft për ta lëndimi dhe mos respekti ndaj qytetarëve”, ka shkruar ajo.