Detaje të reja janë publikuar për vrasjen e shqiptarit Armando Beqiri katër ditë më parë në shtetin e Islandës. Policia në zonën ku ndodhi ngjarja, në Reikjavik ka arrestuar 4 persona në 24 orët e fundit ndërsa më herët kanë rënë në pranga edhe 4 persona të tjerë të dyshuar për vrasjen.

Media islandeze DV, tregon se i arrestuari i pari është një 40 vjeçar me origjinë nga Lituania për të cilin gjykata ka dhënë masën e arrestit me burg, mes dyshimeve se mund të jetë autori krimit. Ndërsa për tre të tjerë është vendosur masa e arrestit me burg për një javë.

Mes të arrestuarve është edhe një shqiptar me emrin Anton Kristi, por avokati i tij ka mohuar të ketë lidhje me ngjarjen.

Armando Beqiri me origjinë nga Tepelena jetonte prej kohësh në Islandë. 33 vjeçari ishte pronari i një kompanie sigurimi fizik. Shkaqet e vrasjes mbeten ende mister, por pista e hetimit është ajo e përplasjes mes bandave, ndonëse nuk njihej si person problematik. Hetimet për ngjarjen vijojnë.