Kryetari i Partisë Demokratike Lulzim Basha, përmes një mesazhi, uron kryeministrin e ri të Kosovës Albin Kurti.

Në mesazhin e tij, teksa uron edhe deputetët e legjislaturës së tetë të Kosovës, Basha shprehet i bindur se pas 25 Prillit bashkëpunimi Shqipëri-Kosovë do të jetë edhe më i ngushtë.

Mesazhi i plotë i kreut të PD-së, Lulzim Basha:

Urimet më të mira kryeministrit të ri të Kosovës z. Albin Kurti dhe qeverisë së drejtuar prej tij në përmbushjen me sukses të përgjegjësive dhe tejkalimin e sfidave me të cilat përballet Kosova. Suksesi i Kosovës është suksesi i Shqipërisë dhe i shqiptarëve kudo që ndodhen.

Urimet më të mira shkojnë sot dhe për deputetët e kuvendit të ri të Kosovës. Jam i bindur se forcat politike në Kosovë do të mund të gjejnë gjuhën e përbashkët për tejkalimin e pengesave, duke vënë mbi gjithçka interesin më të mirë të Kosovës dhe qytetarëve të saj.

Si gjithnjë në të kaluarën, të sotmen dhe në të ardhmen, unë dhe Partia Demokratike do të qëndrojmë fuqimisht në mbështetje të Kosovës dhe të qeverisë së saj me besimin e plotë se pas 25 prillit, do të bashkëpunojmë edhe më ngushtësisht për të përballuar së bashku çdo sfidë.