Shqipëria nuk do të mbetet jashtë luftës tregtare që ka nisur Donald Trump me pjesën më të madhe të globit.

Një vendim i mesnatës së djeshme, e listonte Shqipërinë si një nga vendet që do të tarifohen me 10% për produktet që futen në ‘tokën e bekuar’.

Një tarifë 10% për eksportet shqiptare pritet të ketë ndikim të drejtëpërdrejtë në industrinë e bimëve medicinale në vend, që kanë destinacion kryesor Amerikën e Veriut.

Shifrat e INSTAT tregojnë se 32% e bimëve mjekësore dhe aromatike të prodhuara për eksport, shiten në SHBA. Përkthyer në vlerë, vetëm për vitin 2024, Shqipëri çoi në SHBA 1.65 mld lekë bimë medicinale. Në total, ky treg zë 1.5% të eksporteve në vend.

Filip Gjoka, kreu i shoqatës së bimëve medicinale dhe aromatike pohoi se tarifa 10% do të ketë ndikim në këtë treg dhe do të ushtrojë presion mbi çmimet, por theksoi se shoqata po kryen një analizë më të detajuar për zhvillimet e fundit.

Gjoka i tha Gazetasi.al se tarifat e Trump mund të kenë dhe një efekt pozitiv, duke nxitur më shumë investime në tregun jo fort të suportuar të bimëve në Shqipëri.

Xhevit Hysenaj, nga kompania e përpunimit dhe eksportimit të bimëve aromatike AlbKalustyan, e përshkruan tarifën 10% për këtë treg si një “tërmet”. Duke theksuar se është ende shumë herët për të dalë në një konkluzion, Hysenaj thotë se Shqipëria mund të humbasë pozitën e saj konkurruese përballë vendeve të tjera.

“Blerësit amerikanë tarifën 10% do na e faturojnë neve. Ata kanë opsione Turqinë, Indinë e shtete të tjera. Ne mund të bëjmë negociata me ata por duhet të shohim. Nëse ata na e faturojnë ne, do të shkojë si një valë tërmeti që do të godasë fermerin dhe normalisht do të ndërpresë prodhimin. E vetmja shpresë është suporti nga qeveria”, thotë Hysenaj duke sugjeruar që qeveria të rimbursojë fermerët e jo eksportuesit, për tarifën 10%.

Shqipëria do të preket dhe nga tarifa 25% e çelikut, si eksportues i çelikut në SHBA. Sipas INSTAT në 2024-n, vendi jonë çoi përtej Oqeanit 2.95 mld lekë gizë dhe çelik, ku giza mban peshën më të madhe.

Eksperti i tregtisë së jashtme, Genti Beqiri thotë për Gazetasi.al se Shqipëria s’i shmanget dot efektit të tarifave me apo pa eksport të drejtëpërdrejtë me SHBA-në.

“Me kalimin e kohës, duke qenë se partnerët kryesorë tregtarë të Shqipërisë janë Italia, Greqia, Turqia dhe Kina që do të preken rrjedhimisht ky efekt do të zhvendoset dhe tek ne, duke u përkthyer në produkte më të shtrenjta”, argumenton Beqiri duke theksuar se si pasojë e situatës së re globale, do të preken edhe investimet e huaja .