Dy turistë gjermanë, nënë e bir, janë shpëtuar me sukses nga forcat e Policisë së Tiranës dhe Njësia Alpine e Forcës Kombëtare të Sigurisë, pasi kishin humbur rrugën gjatë një eksplorimi në zonën e njohur si “Shpella e Pëllumbasit”.

Sipas njoftimit zyrtar, shërbimet e Komisariatit të Policisë Nr. 1 morën menjëherë masa sapo u njoftuan për rastin, duke organizuar kërkimet në bashkëpunim me njësitë speciale të terrenit.

Pas disa orësh kërkimi, të dy turistët u lokalizuan dhe u gjetën në gjendje të mirë shëndetësore.

Turistët shprehën mirënjohje për reagimin e shpejtë dhe profesional të strukturave të Policisë dhe njësive mbështetëse, duke vlerësuar ndihmën e ofruar në një situatë të vështirë.

Policia e Tiranës theksoi se mbetet tërësisht e angazhuar për sigurinë e turistëve dhe ftoi qytetarët dhe vizitorët që për çdo nevojë të kontaktojnë numrin emergjent 112, i cili ofrohet pa pagesë.