Dalin detaje të reja nga shpërthimi që ndodhi mbrëmjen e kaluar në Fushë-Krujë.

Shpërthimi me lëndë plasëse ndodhi në oborrin e banesës së 48-vjeçarit Arben Pllumbit në fshatin Halilaj mbrëmjen e së martës.

Për pasojë pati vetëm dëme materiale pasi në banesë nuk banon njeri. Pllumbi bashkë me vajzën 22-vjeçare dhe djalin 18-vjeçar, prej disa kohësh jetojnë në shtëpinë e vëllait në Krujë pasi ka nënën e sëmurë.

Kjo është e dyta herë që ndodh një shpërthim me eksploziv në këtë banesë. Më dy tetor të vitit që shkoi u vendos lëndë eksplozive në banesën në Halilaj, dhe pas dy javësh në shtëpinë e vëllait në Krujë ku pati vetëm dëme materiale.

Arbeni, jashtë kamerës tregon se dyshojnë që shkak mund të jetë një miqësi e prishur më shumë se dy vite më parë, ndërsa shton se nuk ka konflikte me askënd tjetër. Ndërkohë, policia ka shoqëruar disa persona që mund të kenë dijeni për ngjarjen.