Kryetarët e degëve të PD-së janë kundër dorëheqjes së kreut të PD-së, Lulzim Basha i cili e bëri me dije vendimin disa minuta më parë përmes një deklarate publike për mediat nga selia blu pas mbledhjes që zhvilloi me Kryesinë, Grupin Parlamentar dhe Kolegjin e Kryetarëve.

ABC News raporton se të parët që e kanë kontestuar vendimin e Bashës janë kryetarët e degëve.

Lulzim Basha jep dorëheqjen si kryetar i PD-së

Lexo edhe:

Drejtori i Policisë së Shqipërisë: Bashkëpunimi me Policinë e Kosovës, model suksesi në rajon

Ambasadori shqiptar në SHBA: Sekretari Rubio do ta vizitojë Shqipërinë

Përdhunoi vajzën e tij për 7 vite me radhë, Prokuroria nxjerr detajet tronditese: Ja si u zbulua “babai monstër”

Tani ish-kreu i PD-së, Basha ka dhënë dorëheqjen pas 9 vitesh në krye të Partisë Demokratike. Basha pranoi se Partia Demokratike është në krizë të thellë dhe për këtë arsye ka vendosur që të dorëhiqet nga detyra e tij si kryetar i PD-së, për t’i hapur rrugë bashkimit të demokratëve. Tashmë i dorëhequr nga funksioni i tij, Basha siguroi se do të japë kontributin e tij për të ndihmuar në ringritjen e PD-së. Ai tha se në PD duhet të zhvillohet një analizë e brendshme dhe më pas zgjedhje të reja.

Pas dorëheqjes së Bashës pritet që Sekretari i Përgjithshëm i PD, Gazmend Bardhi të mbledhë Këshillin Kombëtar dhe të mandatojë një nga nënkryetarët e partisë që të drejtojë PD deri në zgjedhjen e kryetarit të ri. Kësisoj drejtimin e PD e merr ose Jorida Tabaku ose Enkelejd Alibeaj.

Vlen të përmendet se dy nënkryetarët e tjerë, Grida Duma dhe Agron Gejkmarkaj dhanë dorëheqjen nga posti pas humbjeve të 6 marsit në 6 bashkitë e vendit. Neni 46 pika 4 e statutit te PD thotë se në mungesë të zgjatur të kryetarit dhe me autorizim të tij, njëri prej tyre zëvendëson Kryetarin.

Në mungesë të këtij autorizimi, duke përfshirë rastet e dorëheqjes nga detyra të Kryetarit, Sekretari i Përgjithshëm mbledh Këshillin Kombëtar, i cili komandon Nënkryetarin që do të drejtojë Partinë deri në rikthimin e Kryetarit në detyrë apo zgjedhjen e Kryetarit të ri./abcnews