Kryebashkiaku i Tiranës, Erion Veliaj ka hedhur poshtë të gjitha aludimet e se ka një krisje në marrëdhëniet mes tij dhe kryeministrit Edi Rama.

Përmes një reagimi në Facebook, Veliaj shkruan se ai ka mall të takohet me Ramën, dhe se e gjithë ajo që është hamendësuar në media për një përplasje për ridelegim kompetencash në Bashki, ka ardhur vetëm për shkak të mungesës së informacionit që ka për shkak të kushteve në të cilat ndodhet.

Postimi i Veliajt:

U informova që paska plasur peshku në moçalet mediatike për përplasjen time me Ramën, për punë delegimesh.

E para njëherë, me Ramën kam vetëm mall të takohem për të folur për punët si gjithmonë dhe asgjë tjetër s’më shkon në mendje.

E dyta, kam firmosur një ridelegim me idenë e gabuar se ishte dakordësuar brenda ekipit drejtues, por kështu është kur “punon” pa informacionin e mjaftueshëm.

E fundit, kërkoni e gërmoni ku të doni tani, se u bë sport ky falë edhe prokurorit tim të dashur, por në marrëdhënien time me Ramën lodheni kot fare fare, se është plazmuar në kohëra të vjetra dhe nuk e ndryshon dot asnjë kohë, sado e mallkuar qoftë. Delegimi është rikthyer aty ku ishte dhe këtu mbyllet edhe keqkuptimi.