Pas protestës së Shoqatave të Transportit para Ministrisë së Infrastrukturës, ka reaguar edhe kryeministri Rama.

Rama përmes një postimi në Facebook, shkruan se qeveria do ta mbështesë këtë sektor duke e njohur si shpenzim të zbritshëm të 100% të konsumit të naftës, si dhe zero taksa e tarifa vendore deri në 31 dhjetor 2020.

Rama siguron se ndalohet kategorikisht rritja e çmimit të biletës për qytetarët.

Postimi i tij:

Të hënën 15 qershor rinis shërbimi i transportit urban dhe ndërurban, sipas protokollit të miratuar të sigurisë shëndetësore. Qeveria do ta mbështesë këtë sektor përmes:

Njohjes si shpenzim të zbritshëm të 100% të konsumit të naftës.
Zero taksa dhe po ashtu zero tarifa vendore deri në 31 dhjetor 2020.

Brenda 2020 do të kryhet reforma e plotë ligjore/fiskale e sektorit dhe në 1 janar 2021 do të nisë zbatimi i saj me biletën elektronike si hap i pare. Ndalohet kategorikisht rritja e çmimit të biletës për qytetarët.