Ambasada e ShBA-së ka njoftuar se është gati për të zhvilluar nesër misionin e saj të vëzhgimit të zgjedhjeve në Shqipëri.

“Ne do të monitorojmë si qendrat e votimit ashtu edhe ato të numërimit gjatë gjithë procesit. Ne do të jemi atje derisa puna të jetë e kryer“, theksohet në njoftim.

Ambasadorja e Amerikës në vendin tonë, Yuri Kim ka qenë e pranishme në sferën politike, ku ka bërë thirrje për zgjedhje të qeta dhe u ka kërkuar drejtuesve të partive politike të mos nxisin konflikte.

Sot, Kim u takua me kryedemokratin Basha, ku përsëriti thirrjen për zgjedhje të lira dhe të qeta. “Ne e ritheksojmë se nuk mbështesim asnjë forcë politike apo kandidatë. Por, në mënyrë absolute mbështesim të drejtën për të gjithë qytetarët të votojnë paqësisht dhe të lirë”.

Madje, dje ambasadorja i kërkoi Prokurorisë së Posaçme kundër Korrupsionit dhe Krimit të Organizuar të ndjekë penalisht këdo që përpiqet të pengojë qytetarët të votojnë të lirë.

“Ne e nxisim SPAK të ndjekë penalisht ata që shkelin ligjin dhe pengojnë të drejtën e qytetarëve për të votuar lirshëm dhe në paqe. Kjo përfshin ata që merren me blerjen e votës, frikësimin ose nxitjen e dhunës. SPAK po heton në mënyrë aktive krimet zgjedhore”.