Disa asamblistë dhe aktivistë për të drejtat e njeriut në Komunën e Medvegjës i janë drejtuar me një letër shefit të OSBE-së në Serbi, Jan Braathu.

Përmes kësaj letre ata kanë shprehur pakënaqësitë e tyre në lidhje me siç thonë ata në letër, “anashkalimin e plotë” që i është bërë shqiptarëve të Medvegjës në dialogun për implementimin e “Planit 7 pikësh”.

“Shqiptarët e Medvegjës nuk mund të lihen jashtë çfarëdo lloj dialogu me autoritetet shtetërore serbe. Shkeljet e të drejtave të shqiptarëve janë tepër të mëdha që të mos konsultohen fare përfaqësuesit shqiptarë të Medvegjës”, thuhet ndër të tjera në këtë letër.

Po ashtu, ata e kanë ftuar ambasadorin Braathu që të bëj një vizitë në Medvegjë, për të parë nga afër problemin e tyre të pasivizimit të adresave.