Në rrjetin social Facebook po qarkullon një video ku shihen një grumbull i grave teksa këndojnë me def në një dasmë në Rrugën “C” në Prishtinë.

Mosrespektimi i rekomandimeve nga MSH e IKSHPK po vazhdon nga kosovarët edhe në kohën kur COVID-19 po arrin kulmin në Kosovë, shkruan Reporteri.net.

Ditët e fundit në Kosovë ka pasur rritje të numrit të rasteve të reja me koronavirus, ku vetëm gjatë ditës së djeshme janë konfirmuar 178 raste të reja dhe 8 vdekje si pasojë e COVID-19.

Situata është rënduar edhe më tej, ku vetëm që nga mesnata kanë vdekur edhe 4 pacientë që ishin të shtrirë në Klinikën Infektive, duke e çuar kështu numrin total të vdekjeve në 70.

Qeveria e Kosovës ditë më parë ka marrë vendim që të ndalojë tubimet e më shumë se 50 personave në hapësira të mbyllura e të hapura, por siç duket vendimet e Qeverisë dhe rekomandimet e Institutit Kombëtar të Shëndetësisë Publike të Kosovës dhe Ministrisë së Shëndetësisë, nuk po merren parasysh nga qytetarët e Kosovës.

Rastet e para me koronavirus në Kosovë u regjistruan më 13 mars.

Që atëherë, deri më 4 korrik, sipas të dhënave të publikuara nga IKSHPK, 3,356 persona janë infektuar me koronavirus.

Video:

/Reporteri.net/