Pas vendimit të Panelit Zgjedhor për Ankesa dhe Parashtresa, sot në Qendrën e Numërimit dhe Rezultateve, nis rinumërimi e 1472 vendvotimeve.

Këtë e ka konfirmuar për Reporterin, zëdhënësi i KQZ-së, Valmir Elezi. Ai ka thënë se procesi i rinumërimit të 1472 vendvotimeve do të fillojë në orën 16:00.

“Ju njoftoj se sot (e mërkurë, 13 nëntor, ora 16:00) në Qendrën e Numërimit dhe Rezultateve fillon procesi i rinumërimit të vendvotimeve pas vendimit të Panelit Zgjedhor për Ankesa dhe Parashtresa”, ka thënë Elezi.

Kujtojmë se të hënën Paneli Zgjedhor për Ankesa dhe Parashtresa (PZAP), kishte miratuar si të bazuar ankesën e koalicionit Nisma-AKR-PD, në lidhje me votat e ardhura me vonesë nga Serbia.

Po ashtu, në të njëjtën ditë, PZAP kishte urdhëruar KQZ-në, për rinumërimin e 1 mijë e 472 vendvotimeve. /Reporteri.net