Kryeministri i Kosovës, Albin Kurti ka bërë të ditur se gjatë qëndrimit në Stamboll është takuar me shkrimtarin e shquar turk Orhan Pamuk, shkruan gazeta online Reporteri.net.

Kurti ka thënë se fillimisht nuk kishte besuar kur i thanë se shkrimtari turk po e ftonte për darkë. Kryeministri thotë se Pamuk është shumë i interesuar për Kosovën, shqiptarët e Ballkanin në përgjithësi.

“Në fillim nuk i besova doktorit Bilgin Sait, që shkrimtari Orhan Pamuk po më fton për darkë. Gjersa afrohej mbrëmja, minutat më dukeshin të gjata porsi orët, ndërkaq tri orë e gjysmë me të më ikën porsi minutat. Në restoranin Sur Balık-Cihangir të lagjes Beyoğlu në Stamboll temat e bisedës ndërroheshin më shpesh se pjatat mbi tryezë. Mbase arritëm të shkruajmë përmbledhjen hyrëse të kapitujve të miqësisë sonë të ardhshme. Artisti Orhan Pamuk, fitues i çmimit Nobel për Letërsi në vitin 2006, ka një dashamirësi spontane dhe vëmendje të frikshme. Dhe, aq shumë i interesuar për Kosovën, shqiptarët, Ballkanin. Nder që nuk e shpjegoj, kënaqësi që nuk e përshkruaj”, ka shkruar Kurti.

Orhan Pamuk konsiderohet si një prej shkrimtarëve më të njohur në Turqi. Ai është fitues i çmimit Nobel për Letërsi në vitin 2006. /Reporteri.net/