Në Kuvendin e Kosovës ka nisur një seancë e jashtëzakonshme lidhur me shtrenjtimin e energjisë elektrike, e thirrur nga Aleanca për Ardhmërinë e Kosovës (AAK).

Shefi i Grupit Parlamentar të AAK-së Besnik Tahiri tha se Lëvizja Vetëvendosje nuk është pjesëmarrëse në këtë seancë dhe sipas tij kjo tregon papërgjegjësi, shkruan Gazeta Online Reporteri.net.

“AAK nuk e ka lëshuar dje sallën, kemi nejt në sallë për të debatuar…sot, LVV e cila nuk është këtu, Grupi Paralamentar më i madh e injoron debatin mbi një çështje e cila ka një rendësi të jashtëzakonshme. Kjo treegon papërgjegjësi, kjo tregon ikjen nga debati, kjo tregon se kjo ka qenë e sinkronizuar me ZRRE”, tha Tahiri.

Tahiri ka njoftuar se AAK ka mbledhur 40 nënshkrime, së bashku me deputetët e LDK-së dhe PDK-së.

Ndryshe, nga sot do të hyjnë në fuqi tarifat e reja të energjisë elektrike të cilat u miratuan të martën në mbledhjen e Bordit të Zyrës së Rregullatorit të Energjisë (ZRRE).

Bordi i ZRRE-së ka aprovuar dje rritjen e çmimit të rrymës për konsumatorët që tejkalojnë konsumin mbi 800 kilovat.

Këto tarifa do mbesin deri në vitin 2023. /Reporteri.net/