Presidenti i vendit, Hashim Thaçi, ka dhënë një deklaratë për media pas takimit që ka zhvilluar me delegacionin nga Franca dhe Gjermania.

“Siç e dini sot kemi pritur një delegacion nga Franca dhe Gjermania në kuadër të përgatitjeve të Samitit të Parisit që do të mbahet më 1 korrik.

Mund të them se ishte një angazhim inkurajues i presidentit Macron dhe kanelares Merkel që të ketë përgatitje më të mira për Samitin e Parisit, që të jetë samit që i hap perspektivë dialogut dhe mundësisë së arritjes së një marrëveshje Kosovë-Serbi”, ka thënë Thaçi.

Ai ka shtuar se gjatë këtij takimi ka theksuar se tarifat duhet të mbeten në fuqi, dhe se dialogu duhet vazhduar pa kushtëzime.

“Nga fryma e diskutimit që zhvilluan sot shoh që ka një angazhim më serioz të një koordinimi gjithë evropian por edhe me SHBA-të si kusht i domosdoshëm për zhvillimin e këtij procesi”, u shpreh Thaçi.

Presidenti theksoi se takimi i Parisit duhet të ndodhë por i pakushtëzuar.

“Askush nga bashkësia ndërkombëtare nuk duhet të lejojë që Beogradi të vë kushte as për Samitin e Parisit e as për vazhdimin e procesit të dialogut”, tha Thaçi.

Ndër të tjera presidenti shtoi se “Kosova në asnjë rrethanë nuk do të pranojë kritere tjera për liberalizim vizave, e as për tarifën”.