Daut Haradinaj dhe Rexhep Selimi janë miq që nga koha e luftës.

Por, ata kishin një përplasje të ashpër në Kuvend vite më parë për shkak të kufijeve dhe më vonë për shkak të Gjykatës Speciale.

E gjitha kishte nisur kur Ramush Haradinaj kishte deklaruar se Selimi ka “knu” në Gjykatën Speciale, duke aluduar se ai ka qenë dëshmitar në dhomat e Specializuara në Hagë.

Selimi i kishte mohuar këto akuza kategorikisht duke thënë se po i bën përshtypje se si Ramush Haradinaj po e këndon këngën e së cilës është autor Hashim Thaçi.

Reagimi i Selimit ndaj Ramushit, nuk i kishte pëlqyer Daut Haradinajt.

“Mos hyn fell’ bre Rexhë! T’kam pasë mik të mirë”, kishte shkruar ai në Facebook.

Por kur Specialja sot i dërgoi ftesë Rexhep Selimit, ia ka dalë në përkrahje këtij të fundit Daut Haradinaj.

“Do dalësh faqebardhë Rexhë, pastër si lufta e UÇK-së”, thotë Haradinaj. /Reporteri.net/.