23-vjeçari, Mehmet Kurti, i cili mbeti i vrarë mbrëmjen e së premtes në vendin e tij të punës, është varrosur sot në fshatin Vllahi të Mitrovicës.

Gazeta Online “Reporteri.net” ka siguruar pamje nga ceremonia mortore, ku shihet se kanë qenë të pranishëm një numër i madh i qytetarëve.

Sipas njoftimit të Policisë, dy persona kanë shtënë me armë zjarri në drejtim të tre personave të tjerë, e ku si pasojë e plagëve të marra, i riu ka humbur jetën.

Lidhur me këtë rast, për Gazetën Online “Reporteri.net” kanë dhënë detaje nga Prokuroria Themelore në Mitrovicë.

Zëdhënësi i këtij institucioni, Valon Preteni tha se nuk dihen arsyet e vrasjes ndëra të dyshuarit janë në arrati.

“Mund të konfirmojmë që pas të shtënave me armë zjarri në rrugën ‘Bislim Bajgora’ (afër ETC), një person i gjinisë mashkullore ka mbetur i vrarë, ndërkaq dy persona tjerë të plagosur janë dërguar për trajtim në Qendrën Klinike Universitare të Kosovës (QKUK). Trupi i personit të vrarë me urdhër të prokurorit është dërguar për autopsi në Institutin e Mjekësisë Ligjore në Prishtinë. Për momentin nuk dihen motivet e këtij rasti, Prokuroria Themelore e Mitrovicës në koordinim me policinë janë duke e hetuar këtë ngjarje”, ka thënë Preteni për Reporteri.net.

Ndërsa zëdhënësi i Policisë së Kosovës, për rajonin e Mitrovicës, Avni Zahiti, mbrëmë konfirmoi për Reporterin vrasjen e 23-vjeçarit.

“Sonte rreth orës 22:20, policia ka marrë informacion për të shtëna me arme zjarri në rrugën ‘Bislim Bajgora’ në Mitrovicë. Menjëherë pas marrjes së këtij informacioni në vendin e ngjarjes kanë dalë të gjitha njësitet e nevojshme policore, të mbështetura edhe nga njësiti rajonal për hetimin e krimeve si dhe njësitë e tjera për ekzaminim të vendngjarjes. Bazuar në të dhënat fillestare, nga arma e zjarrit janë plagosur tre persona, si pasojë njëri nga te plagosurit i moshës 23 vjeçare ka vdekur, vdekjen e të cilit e ka konstatuar mjeku, ndërsa dy të plagosurit tjerë janë dërguar në QKUK për trajtim te mëtejmë mjekësor”, tha Zahiti.

/Reporteri.net