Anesteziologu i Spitalit të Ferizajt Dr. Afrim Tasholli, ka humbur betejën me koronavirusin.

Lajmin e ka konfirmuar kryetari i Ferizajt, Agim Aliu. Në postimin e Aliut thuhet se shëndetësia e Ferizajt humbi njërin nga emrat më të spikatur e më të dashurin profesionist.

Tutje, ai ka shprehur ngushëllime familjes, kolegëve të tij, gjithë komunitetit shëndetësor e bashkëqytetarëve ferizajas.

Njoftimi i plotë i kryetarit:

Me dhembje të madhe e zemërthyer, mora lajmin për ndarjen nga jeta të profesionistit të rrallë, qytetarit shembullor, mikut tim të shtrenjtë, Dr. Afrim Tasholli.

Ferizaj është në zi, shëndetësia e Ferizajt humbi njërin nga emrat më të spikatur e më të dashurin profesionist.

Pa fjalë, i tronditur nga kjo ndarje e parakohshme nga jeta, i shpreh ngushëllime të sinqerta familjes Tasholli, kolegëve të tij, gjithë komunitetit shëndetësor e bashkëqytetarëve ferizajas.

Dritë pastë shpirti i tij!

Tasholli ka qenë duke u trajtuar në Mjekimin Intensiv Qendror Covid në QKUK që disa ditë për shkak të gjendjes së rënduar.

Lajmin për vdekjen e tij e ka edhe konfirmuar drejtori i Spitalit të Ferizajt Dr. Jeton Zeqiri. Ai e ka vlerësuar lart kontributin e Tashollit si specialist dhe profesionist.

Njoftimi i plotë nga Zeqiri:

E zorshme, e dhimbshme e trishtë të flitet për ikjen e hershme të kolegut Afrim Tasholli një njeriu stoik e profesionist.

Stoicizmin e dëshmoi me përpjekjet prej sizifi për ta ngadhënjyer të keqen që e kaploi.

Ai tërë jetën iu përkushtua humanizmit. Një kohë me angazhimin në mjekësin primare të Ferizajt,specializimin në Prishtinë dhe si specialist i Anesteziologjis me Mjekim Intesiv në Spitalin e Përgjithshëm Ferizaj.

Dha kontribut edhe në edukimin e brezave të ri me angazhim në shkollën mesme të mjekësis “Elena Gjika”.

Dr. Afrimi është vetëm njëri nga ne që nuk rreshti që me punën e tij ta lartësojë profesionin e mjekut.

Afrimi ishte njeri i mirë sikurse edhe profesionist i mirë.

Por, sot, Afrimi e humbi betejën nga ky virus nga kjo pandemi që e kaploi mbarë botën.

Afrimi do të kujtohet çdoherë si një nga emrat e mjekëve që kontribuoi në sferën e shëndetësisë dhe standardeve profesionale, të cilave u qëndroi konsistent deri në frymën e fundit.