Ministri i Punëve të Brendshme dhe Administratës Publike, Agim Veliu, ka shprehur ngushëllime familjes Bllaca për humbjen e pesë anëtarëve në Gjilan.
Ai tha se që prej momentit që ka ndodhur rasti, ka angazhuar të gjitha institucionet e sigurisë, si Policinë e Kosovës dhe Inspektoratin Policor të Kosovës për hetimin e të gjitha rrethanat që çuan në kryerjen e kësaj vrasje nga një zyrtare policore, njofton Klan Kosova.
“Në këto momente tragjike Ministria e Punëve të Brendshme dhe Administratës Publike, është pranë familjeve të viktimave të cilët humbën jetën, me bindjen e thellë që me të gjitha mekanizmat shtetërore të sigurisë do të zbardhin shkaqet e vrasjes”, thuhet në komunikatë.
“MPBAP do të përdorë të gjitha kapacitetet e saj institucionale që raste të tilla, ku përfshihen zyrtarë policorë në akte kriminale, të mos përsëriten më”.
