Veseli shkon në veri – takon banorët e disa fshatrave

Kryetari i Kuvendit të Kosovës, Kadri Veseli ka shkuar në veri të Kosovës për të takuar qytetarë të asaj ane.


Kryeparlamentari ka përcjellë mesazhin se nuk do të lejohen tensione e as provokime.

Ai ishte në Çabër të Zubin Potokut nga ku tha se aksioni i sotshëm dhe përpjekjet tjera, janë për të vendosur rend dhe ligj në çdo pjesë të Kosovës.

“Shkova dhe bisedova me banorët e fshatit Çabër të komunës kosovare të Zubin Potokut, për t’i qetësuar dhe siguruar ata se shteti i Kosovës mbetet i përkushtuar për të vendosur rendin dhe ligjin në çdo pjesë të Kosovës. Ne nuk do t’i lëmë asnjëherë vetëm ata. I sigurova që, me përkrahjen e Shteteve të Bashkuara të Amerikës dhe aleatëve tanë perëndimorë, ne do t’ia dalim të ndërtojmë një shtet liberal-demokratik të së drejtës e sundimit të ligjit. Do të ndërtojmë një shtet ku të gjithë qytetarët të bëjnë jetën e tyre të qetë dhe të sigurt në vendin e tyre”, ka shkruar Veseli në një postim në faqen e tij në Facebook.

Ndryshe, gjatë ditës Veseli ka vizituar në Spitalin e Mitrovicës edhe policët e plagosur në aksionin e sotëm në veri./Reporteri.net