Zgjedhjet lokale, Aliu: PDK do të ketë emra të përgatitur

Kryetari i Ferizajt që vije nga Partia Demokratike e Kosovës, Agim Aliu, ka folur rreth zgjedhjeve lokale, respektivisht kandidaturave.


Ai tha per GazetaBlic, se PDK-ja do të ketë emra të përgatitur për garën zgjedhore të vjeshtës që po vie.

“Besoj se PDK-ja do të ketë kandidatë të përgatitur mirë. Siç e ceke pak më parë, Prizreni e Mitrovica kanë qenë vatra të PDK-së, pra nga qendrat e mëdha. Jam i bindur se do të shënojmë rezultate të mira”, tha ndër të tjera i pari i Ferizajt.

Nënkryetari i PDK-së dhe kreu aktual i komunës së Ferizajt, Agim Aliu, ka folur rreth çështjes së dialogut në përgjithësi.

Aliu shtoi se dialogu duhet të përfundojë sa më shpejtë të jetë e mundur, në mënyrë që pastaj të përqendrohen në tema të brendshme e zhvillimore.

“Nuk mund të bëhet shmangia e dialogut. Dialogu duhet të përfundojë sa më shpejtë. Mos të mbesim në këto tema edhe më tutje. Krerët, kushdo qofshin ata duhet të marrin përgjegjësi”, tha fillimisht Aliu.

Ndërkaq, kur u pyet se a mund të jetë Albin Kurti ai kryeministër që do të mund t’i jepte fund kësaj çështjeje, ai u përgjigj:

“Do të doja që Albin Kurti të ishte kryeministri që do t’i jepte fund këtyre pritjeve”, përfundoi Aliu.