Dua Lipa edhe sivjet merr pjesë në “Sunny Hill”

Këngëtarja shqiptare me famë botërore, Dua Lipa, do të qëndrojë për një periudhë të shkurtër kohore në Kosovë gjatë edicionit të sivjetmë të festivalit “Sunny Hill Festival”.

Kështu ka bërë të ditur Alban Kastrati nga “Sunny Hill Festival”, ndërsa ka treguar se Dua nuk do të këndon.

Ai ka thënë në KTV se Lipa do të vijë në Kosovë për t’u marrë me çështjet e fondacionit “Sunny Hill” dhe se nuk dëshiron të humbë netët e festivalit.

Sipas tij, Lipës i ka mbetur hatri që në edicionin e shkuar nuk kishte arritur të shijonte natën e tretë të festivalit ku kishte performuar DJ Martin Garrix.

Kastrati ka konfirmuar po ashtu se edhe sivjet do të ndahen fonde nga “Sunny Hill” për organizata të ndryshme.

Edicioni i sivjetmë i “Sunny Hill Festival” do të mbahet më 2,3 dhe 4 gusht.

Në edicionin e shkuar, Dua Lipa ishte ylli kryesor në natën e parë të festivalit, në të dytën reperi Action Bronson e në të tretën Martin Garrix.