Mad Clip, reperi i njohur me origjinë greke, vdiq pak ditë më parë pas një aksidenti me makinë në Vouliagmeni të Athinës.

Makina “Porsche” që po voziste, devijoi nga rruga dhe u përplas në një shtyllë.

Përplasja ishte shumë e fortë pasi vetura u shkatërrua plotësisht dhe madje grupit hetimor iu desh kohë të zbulonte që viktima ishte reperi, emri i vërtetë i të cilit është Peter Anastasopoulos.

Mediat e huaja raportojnë se shërbimet zjarrfikëse u përpoqën me orë të tëra për të nxjerrë trupin nga automjeti.

Ndërkohë mediat greke kanë publikuar momentet e fundit të jetës së reperit, që shfaqet duke lëvizur në rrugë me shpejtësi skëterrë.

Videoja është kapur nga kamerat e sigurisë dhe në të është regjistruar momenti kur Mad Clip humbet kontrollin e makinës dhe më pas përplaset me një shtyllë.

Në video shihet dhe një makinë nga pas që shtyp frenat, duke tentuar që t’i shpëtojë ndonjë përplasjeje. Ky moment i kapur nga kamerat po shqyrtohet për të zbuluar shkaqet e aksidentit tragjik.