Gjykata e Krimeve të Rënda ka dhënë masën e sigurisë “Arrest me burg”, për shtetasin Ragip Hajdini, i akuzuar për grabitjen e Rinasit.
Përpara togave të zeza ai tha se nuk ka lodhje me ngjarjen.
Seanca gjyqësore u zhvillua me dyer të mbyllura, pa praninë e medieve.
Mësohet se 50-vjeçari mbajti qëndrim mohues gjatë gjithë procesit, raporton “t.ch”.
Dyshohet se Hajdini është anëtari i grupi të strukturuar kriminal dhe ndaj tij rëndojnë akuzat si grabitje me armë, armëmbajtje pa leje, vrasjen e efektivëve të policisë, mbetur në tentative, mbi grabitjen e datës 9 prill 2019 në Aeroportin e Rinasit
Deri më tani ka shkuar në 6 numri i të arrestuarve për grabitjen e Rinasit. Ragip Hajdini është nga Kosova dhe u prangos në Kavajë pak ditë më parë, me dyshimet se është njëri nga bashkëpunëtorët e kësaj ngjarjeje të bujshme. Ai është përshkruar nga Alkond Bengasi si “Daja” nga Kosova, i cili takohej shpesh me Klement Çalën dhe Admir Muratajn.
Ragip Hajdini nuk është një emër i panjohur për policinë e shqiptarëve të përtej kufirit.
Ragip Hajdini, kosovari që u arrestua nën dyshime për përfshirje në grabitjen e Rinasit, ishte dyshuar për përfshirje edhe në rastin e njohur në Kosovë të vjedhjes së arit në dhomën e dëshmive të Policisë në Pejë, shkruan Reporteri.net. Rasti kishte ndodhur në prill të vitit 2012.
Hajdini dhe gjashtë persona të tjerë ishin hetuar nga një Prokuror i EULEX-it si të dyshuar për implikim në vjedhjen e arit, që kishte ndodhur brenda Policisë në Pejë.
Grabitja në fjalë ndodhi më 9 prill të këtij viti. Gjithçka kishte ndodhur për 4 minuta.
Grabitësit me një kombi vodhën paratë që po ngarkoheshin në një avion austriak. Në ndjekje të grabitësve, njëri prej tyre u qëllua për vdekje nga Policia Shqiptare.