Pas grabitjes së 10 milionë eurove, zbulohet dhe një skandal tjetër në aeroportin e Rinasit

Veç grabitjes së 10 milionë eurove, duket se siguria e aeroportit të Rinasit ka probleme sigurie edhe në përditshmëri.


Report Tv zbardh ekskluzvisht kërkesën e Policisë së Shtetit drejtuar kompanive ajrore, duke u ngritur shqetësimin se nga bagazhet e pasagjerëve vidhen sende me vlerë. Policia ka kërkuar marrjen e masave shtesë për shmangien e fenomenit.

Policia kërkon që të monitorohen kamerat dhe të bëhet e mundur futja e valixheve në kontenierë për të shmangur kontaktin me punonjësit e ngarkim-shkarkimit. Punonjësit të cilët merret me ngarkimin dhe shkarkimin e bagazheve janë të TIA-s.

Qytetarët kanë bërë denoncime për vjedhje të sendeve të tyre në bagazhe. Pranë policisë janë bërë një numër i konsideruar kallëzimesh për humbjen e tableteve, celularëve dhe sendeve të tjera me vlerë.

Për sa i përket valixheve të humbura ka një dëmshpërblim nga kompania ajrore por kur ato konstatohen të vjedhura, duhet fillimisht të bëhet një hetim për të gjetur përgjegjësin për vjedhjen e kryer.

Lidhur me këtë fakt kompania e sigurisë së aeroportit nuk ka marrë masa duke mos iu përgjigjur kërkesës së policisë. Shkresa e policisë është dërguar që në korrik 2018.

Për sigurinë në aeroportin e Rinasit, është përgjegjëse TIA, kompania kineze e sigurisë.

Në datë 9 prill siguria në këtë aeroport u cënua rëndë pas grabitjes ku u morën miliona Euro për rreth 4 minuta.