Vlora prej një jave pa traget drejt Brindisit, penalizohen qytetarët

Prej 7 ditësh, trageti i linjës Vlorë-Brindisi ka ndërprerë punën, duke penalizuar qytetarët. Për këtë situatë janë njoftuar autoritetet italiane dhe shqiptare.


Prefekti i qarkut të Vlorës, Flamur Mamaj, ka kërkuar që këto institucione të marrin masa për zgjidhjen e situatës.

Mamaj: I kërkuar konsulles të njoftojë palën italiane dhe të marrë masat e duhura që trageti të jetë i disponueshëm. Do të njoftojmë dhe dikasteret përkatëse në qeverinë shqiptare me qëllimin që kjo situatë të mos përsëritet.

Për zgjidhjen e situatës është tentuar futja në këtë itinerar i operatorëve të tjerë por mjeti lundrues që do ta zëvendësonte tragetin aktual nuk i përmbushte standardet.

Mamaj: Nuk plotëson kushtet për të udhëtuar, qeveria shqiptare dhe ministria nuk i ka dhënë leje. I kanë përfunduar të gjitha licencat dhe nuk është traget i sigurt.

Trageti i linjës Vlorë-Brindisi kishte kërkuar leje për ndërprerjen e punës për pesë ditë, por nuk e ka respektuar afatin.

Situata e cila dëmton qytetarët është e përsëritur, ndërkohë që ndërprerja e punës ka paralizuar lëvizjen e pasagjerëve, por edhe aktivitetin e bizneseve.

Kompania ka deklaruar se ndërprerja e punës së tragetit lidhet me një remont që po kryen mjeti lundrues, por deri tani nuk ka një zgjidhje për qytetarët.