Kylian Mbappe dhe Robert Lewandowski kanë ngritur shqetësime rreth mbajtjes së Kupës së Botës çdo dy vjet, duke thënë se ajo do ta humbiste rëndësinë.

FIFA ka propozuar mbajtjen e Botërorit çdo dy vjet në vend se të mbahet çdo katër vjet, raporton Gazeta Express.

Sipas shtëpisë së futbollit botëror, mbajtja e Kupës së Botës çdo dy vjet do të sillte më shumë se 3.3 miliardë euro të hyra gjatë një periudhe katërvjeçare.

“Kupa e Botës është Kupë e Botës. Është diçka e veçantë sepse mbahet çdo katër vjet”, tha Mbappe.

UEFA, ligat e mëdha evropiane dhe shtëpia e futbollit të Amerikës Jugore e kanë kundërshtuar planin e FIFA-s.

“Është gjëja më e mirë, gara më e mirë në botë. Nëse mbahet çdo dy vjet, atëherë fillon të duket normale të luash në Kupën e Botës, dua të them se kjo nuk është normale. Duhet të jetë e mahnitshme”, theksoi Mbappe i cili e fitoi Botërorin 2018 me Francën.

Sulmuesi i Bayern Munich dhe Polonisë, Robert Lewandowski, i bëri jehonë komenteve të sulmuesit francez për këtë çështje.

“Ne kemi shumë ndeshje çdo vit, shumë javë të vështira, jo vetëm ndeshjet por edhe përgatitjet për sezonin, përgatitjet për turnet e mëdhenj”, tha Lewandowski.

“Nëse doni të ofroni diçka të veçantë, diçka ndryshe, kemi nevojë për pushim. Nëse e kemi Kupën e Botës çdo dy vjet, atëherë pritet që niveli i lojës së futbollistëve të bjerë. Fizikisht dhe mendërisht është e pamundur”, shtoi 33-vjeçari.