Juventusi do të udhëtojë në Sassuolo pa Arthur, Weston McKennie dhe Manuel Locatelli, por kriza e tyre e lëndimeve në mesfushë mund të vazhdojë deri në fund të sezonit, shkruan Reporteri.net. 

Adrien Rabiot dhe Denis Zakaria mbeten lojtarët e vetëm të disponueshëm për Max Allegrin për ndeshjen e nesërme në stadiumin Mapei.

Danilo është vendosur në mesfushën qendrore gjatë javëve të fundit dhe e njëjta gjë mund të ndodhë edhe nesër.

Arthur mund të kthehet në aksion kundër Venezias javën e ardhshme, por Locatelli dhe McKennie mund të mos kthehen para sezonit 2022-2023.

Locatelli u përjashtua për katër javë në fillim të muajit pas një ndrydhjeje të gjurit.

McKennie kishte pësuar një frakturë komplekse të kockave të metatarsale të 2-të dhe të 3-të të këmbës së majtë në ndeshjen e Juventusit në Ligën e Kampionëve kundër Villarrealit në shkurt.

Allegri fillimisht tha se ai nuk do të kthehej para fundit të sezonit, por më pas pretendoi se mesfushori kishte një shans të vogël për t’u rikthyer në ndeshjet e fundit të sezonit. Ai nuk u duk aq optimist gjatë një konference për shtyp sot para ndeshjes.

“McKennie vrapoi pak dje, kështu që ai po përmirësohet, por fundi i sezonit është afër,” tha trajneri.

“Locatelli është ende prapa. Nuk e di nëse ai do të kthehet para fundit të sezonit”.

Juventusi është pesë pikë mbi Roma e vendit të pestë me një lojë më pak, por ndeshja më e rëndësishme e sezonit është finalja e Kupës së Italisë më 11 maj kundër Interit.

Që nga sot, nuk ka gjasa që McKennie dhe Locatelli të jenë të gatshëm për  ndeshjen kundër Nerazzurrëve dhe ndeshjet e fundit të 2021-22.