Barcelona në ankth për një prej yjeve të saj. Shqetësuese është gjendja fizike e Sergio Aguero. Sulmuesi argjentinas pati probleme në fushën e lojës, gjatë ndeshjes me Alaves.

Në minutat e fundit të pjesës së parë të lojës, “El Kun” u shtri në tokë. Ai mbante një dorë në gjoks dhe tjetrën në grykë, duke konfirmuar se e kishte të vështirë të merrte frymë. Arbitri ndaloi lojën me urgjencë dhe në fushë hynë mjekët.

Pas kontrollit të shpejtë, Aguero u largua nga terreni i lojës. Lajmi i mirë ishte se ai mund të ecte pa ndihmë, por menjëherë u paraqit në spital, duke kryer me urgjencë disa kontrolle kardiake. Vizitat mjekësore u konfirmuan nëpërmjet një njoftimi zyrtar, nga klubi i Barcelonës.

Nga imazhet e ndeshjes, nuk duket që sulmuesi të ketë pësuar ndonjë traumë gjatë lojës, teksa mediat iberike flasin për aritmi. Gjithashtu, nëna, vëllai dhe e fejuara e futbollistit e vizituan në spital dhe kur dorën bënë me shenjë që situata është e stabilizuar.