Mbrojtja e arritjeve të mëparshme vazhdon të mbetet detyra më e vështirë në sport. Pa u mbushur mirë me frymë pas fitores tepër të vështirë me Leedsin në javën hapëse, Liverpooli do të masë forcat me ekipin e Chelsea-t, për më tepër brenda në kryeqytet.

Një sfidë tepër e veçantë që përmban gjithçka dhe që pritet të shërbejë edhe si treguesi i parë i mirëfilltë për forcën e vërtetë të të kuqve në këtë sezon.

Ndeshja e parë konfirmoi probleme shumë të mëdha në repartin e prapavijës te të gjithë mbrojtësit, ndërsa përpara skuadra prej disa kohësh nuk krijon më po aq sa krijonte më parë.

Klubi nga Merseyside e ka ngritur stekën vërtet shumë lart dhe tani skuadra do të përpiqet të përballojë gjithë këtë ritëm të lartë. Misioni i vështirë i mbrojtjes së titullit ka nisur dhe Chelsea përfaqëson pikërisht një ndër kundërshtarët më të fortë të këtij edicioni.

Edicionin e kaluar të kampionatit anglez blutë e mbyllën me plot 33 pikë më pak se ekipi i Liverpoolit, për më tepër edhe trenin e fundit për në Champions skuadra e drejtuar nga trajneri Franck Lampard e kapi vetëm në javën përmbyllëse të Premiership-it.

Frankie vërtet e përmbushi më së miri objektivin e klubit londinez, por është e qartë që një diferencë e tillë nuk mund të tolerohet më nga drejtuesit. Sa për statistikë klubi i famshëm nga Merseyside e fitoi titullin e parë pas plot tre dekadave duke grumbulluar 99 pikë, ndërsa një sezon më parë të kuqtë e humbën trofeun më të lakmuar në ishull, ndonëse e përfunduan atë edicion në kuotën e 97 pikëve.

Në vitin 2019 pra Jurgen Klopp dhe ekipi i tij e humbën titullin për thjesht një pikë të vetme, megjithatë bën përshtypje pikërisht kuota tepër e lartë e pikëve. Skuadrat e kreut këtë sezon me shumë gjasa do të shkëputen përsëri shpejt në kohë, duke patur parasysh që në elitën e futbollit anglez të klubeve janë ngjitur dy ekipe si Fulham dhe West Bromëich Albion, që kanë diferenca të theksuara me skuadrat e tjera, por shumë pritet të influencojnë gjithashtu edhe Kupat e Evropës, pasi kalendari do të ngjeshet ndjeshëm në mënyrë të kuptueshme, për arsye të problemeve të shumta dhe gjithë anomalive që ka shkaktuar pandemia e koronavirusit anemanë globit.

Për të përballuar një sezon të tillë të ngjeshur dhe të përqendruar në një hapësirë shumë më të ngushtë kohe sigurisht që nevojitet edhe një kontigjent i pasur lojtarësh. Pikërisht këtë kishin parasysh edhe drejtuesit e Chelsea-t teksa shpenzuan më tepër se 200 milionë stërlina, për të përforcuar skuadrën me lojtarë të tillë si Hakim Ziyech, Timo Werner, Ben Chilwell, Malang Sarr, Thiago Silva dhe Kai Havertz. Në krahun tjetër ndonëse me shumë vonesë reaguan edhe drejtuesit e Liverpoolit, që afruan në skuadër përveç mbrojtësit grek Tsimikas edhe mesfushorin Thiago Alcantara, ndërkohë krerët e të kuqve kanë siguruar marrëveshjen edhe me futbollistin e Wolverhampton-it Diogo Jota.

Për Liverpoolin kjo do të jetë vërtet prova e parë e vërtetë, por gjithsesi kalendari iu ofron kampionëve në fuqi gjithashtu edhe Arsenalin, brenda muajit shtator, ekip me të cilin të kuqtë provuan një tjetër zhgënjim në Community Shield, pra Superkupën e Anglisë.

Lampard ka shumë alternativa, sidoqoftë janë të shumtë lojtarët që kanë probleme fizike te blutë, ndërsa në anën tjetër trajneri shvab nuk do të ketë në dispozicion vetëm mesfushorin Alex Oxlaide – Chamberlain. Të gjithë janë kurioz për të parë formacionin e Chelsea-t, sidomos pas fitores së vështirë që blutë siguruan në Amex me Brighton-in.

Kjo përballje është shndërruar në një klasike të futbollit anglez, për shkak të rivalitetit që ka ardhur duke u shtuar gjithmonë e më tepër gjatë mijëvjecarit të ri. Fillimisht e ushqyen trajnerët e mëparshëm Jose Mourinho dhe Rafa Benitez, me përballjet fantastike të atyre viteve, ndërsa tani pas polemikave të fundit dhe fitores 5-3 të 22 korrikut radhën e kanë natyrisht Jurgen Klopp dhe Frank Lampard.

Chelsea ka fituar vetëm 1 nga 11 sfidat e fundit ndërmjet tyre në kampionatin anglez, ndërsa sezonin e shkuar të kuqtë triumfuan në të dy takimet që patën në Premiership. Ndeshja Chelsea – Liverpool do të luhet në orën 17:30 në Stadiumin Stamford Bridge dhe do të drejtohet nga kryesori Paul Tierney./SS/