Franca e ka nisur Kampionatin Evropian 2020 në mënyrën më të mirë të mundshme. “Gjelat” sonte kanë mposhtur Gjermaninë, me rezultat minimal 1:0.

Kjo ndeshje ishte në avantazh të Francës, e cila përmes një autogoli të mbrojtësit gjerman, Matts Hummels në minutën e 20-të, arriti t’i arkëtojë tri pikë të arta.

Kjo ndeshje pati raste të ndryshme, ndërkaq, dy gola u anuluan nga gjyqtari i ndeshjes.

Një gol iu anulua super talentit, Kylian Mbappe, kurse goli tjetër iu anulua sulmuesit madrilen, Karim Benzema, nga VAR.

Po ashtu, një penallti iu mohua Mbappes në minutën e 77-të.

Ndryshe, Franca është kampionia aktuale botërore, si dhe aktualisht renditet në vendin e dytë nga FIFA, gjersa në këtë Kampionat Evropian, është favoritja kryesore për marrjen e këtij trofeu.

Ndërkohë një ngjarje interesante ka ndodhur para fillimit të ndeshjes Francë – Gjermani.

Një person me parashutë fluturoi mbi stadium për të ateruar pastaj në fushën e “Allianz Arenas”.

Paragllajdisti (me motor) fluturoi në arenë pa leje. Pastaj ai u pengua në kabllon e kamerës që rri pezull.

Ai për pak kohë humbi kontrollin. Fluturoi vetëm mbi kokat e tifozëve në rendin e parë dhete lojtarët. Pastaj u përplas në tokë.