Trajneri i ri i Kombëtares së Kosovës, Alain Giresse ka folur sonte në konferencën për shtyp para ndeshjes miqësore me Zvicrën e cila do të zhvillohet nesër në Zvicër nga ora 18:00, transmeton Reporteri.net.

E, përzgjedhësi i Kosovës ka thënë se janë marrë të gjitha masat për ndeshjen nesër, ku për Kombëtarem e Zvicrës tha se është një nga pesë ekipet më të mira në botë.

“Kemi marrë të gjitha masat për ndeshjen me Zvicrën, pasi e dimë që është një prej pesë ekipeve më të mira në botë. Nuk kemi përzgjedhur ende asgjë rreth formacionit, mund të luajnë të gjithë futbollistët e ftuar”, tha trajneri francez.

Tutje, ai përmendi se kjo do të jetë ndeshje emocionale duke patur parasysh historinë e lidhjen e shqiptarëve të cilët luajnë me Zvicrën.

“Duke marrë parasysh historinë, lidhjen e shqiptarëve të Kosovës që luajnë me Zvicrën, besoj se do të jetë ndeshje emocionale. Këtë lojë e kam përgatitur sikurse për ndeshjet tjera dhe nuk besoj se do të kemi telashe në aspektin emocional”, shtoi selektori i “Dardanëve”.

Miqësorja Zvicër – Kosovë do të zhvillohet në stadiumin “Letzigrund” në Cyrih.