Menaxheri i Tyson Fury, Frank Warren, i ka vënë në pikëpyetje aftësitë e rivalit britanik të Fury, Anthony Joshua, për ta rifituar vendin në mesin e boksierëve kryesorë në kategorinë e rëndë.

Warren i ka bërë thirrje londinezit të mos e zhvillojë rimeçin me Andy Ruizin, amerikanin me prejardhje meksikane nga i cili humbi në fillim të këtij muaji në Nju Jork.

“I kam dyshimet e mia. Mendoj se ai nuk duhet ta pranojë rimeçin. Ai mbase duhet të marrë pushim dhe ta rimarrë veten”, tha Warren për BBC 5.

“I takon atij të vendosë, ama nëse e bën atëherë do të luftojë kundër një boksieri i cili këtë herë do të njoftohet për meçin pesë javë para kohe dhe do të stërvitet siç duhet”, shtoi ai.

Ruiz u caktua si kundërshtar i Joshuas për meçin e 1 qershorit në momentet e fundit, pasi boksieri që pritej të boksonte kundër tij, Jarrell Miller, doli pozitiv në testet e dopingut.

Pasi Joshua i humbi tre titujt e botës IBF, WBA dhe WBO pas meçit në Nju Jork, por paralajmëroi më vonë se do të ketë rimeç për t’i rimarrë ata në fund të këtij viti.