Juventusi ka triumfuar ndaj Cagliarit, fitore kjo që e dërgon Juventusin plotë tetë pikë larg Romës e cila gjendet në pozitën e pestë, përcjell Reporteri.net.

Në epërsi së pari kaloi skuadra vendase, ku në minutën e dhjetë realizoi gol sulmuesi i tyre, Joao Pedro.

Ndërkaq, Juventusi shënoi në minutën e 23-të, por që goli i shënuar nga Adrien Rabiot u anulua për prekje e dorë.

Edhe sulmuesi argjentinas, Paulo Dybala kishte rast të mirë në minutën e 31-të, por goditja e tij shkoi ngjitur me shtyllën.

Zonja e Vjetër e gjeti barazimin në minutën e 45-të, kur harkimin e Juan Cuadrados e ktheu në gol Matthis de Ligt me një goditje të bukur me kokë (1-1).

Juventusi shënoi edhe me të filluar pjesa e dytë, por goli i Giorgio Chiellinit u anulua për pozitë jashtëlojë.

Por bardhëezinjtë nuk u ndalën dhe vazhduan sulmet derisa erdhi goli i fitores, ku një pasim i bukur i Dybalas gjeti Dusan Vlahovicin që shënoi për 2-1.