Jurgen Klopp ka lavdëruar skuadrën e tij Liverpool pas fitores 3-2 ndaj Manchester Cityt në gjysmëfinalen e FA Cup, duke e përshkruar pjesën e parë si “një nga më të mirat që kemi luajtur ndonjëherë”, përcjell Reporteri.net.

Liverpool ka arritur në finalen e parë të FA Cup që nga viti 2012 dhe do të përballet me Chelsea ose Crystal Palace, të cilët luajnë nesër, më 14 maj në Wembley.

“Jam absolutisht krenar, ishte e pabesueshme, mendoj se pjesa e parë ishte një nga më të mirat që kemi luajtur ndonjëherë”, tha menaxheri i Liverpool.

“Ne bëmë të gjitha gjërat e duhura, shënuam në momentet e duhura, luajtëm një lojë të jashtëzakonshme në pjesën e parë, më pëlqeu vërtet çdo sekondë”.

Liverpool ishte në avantazh 3-0 në pjesën e parë falë një goditjeje të hershme me kokë nga Ibrahima Konate dhe dy golave ​​të Sadio Mane.

Në fillim  të pjesës së dytë Jack Grealish shënoi një gol për të bërë rezultatin për 1-3, derisa Bernardo Silva shënoi në kohën shtesë.

Kjo u dha tifozëve të Cityt një fije shpresë në fazat e mbylljes, por skuadra e Pep Guardiolës nuk ishte në gjendje të barazoj rezultatin.

“Pjesa e dytë filloi me golin për Man City dhe më pas hapet – cilësia e Cityt është e çmendur dhe mund ta shihni se ishte një lojë shumë më e hapur”, tha Klopp.

“Ne e respektojmë cilësinë e Cityt aq shumë dhe është shumë e vështirë të fitosh kundër tyre. Por për shkak se ne i kemi këta djem në dhomën tonë të zhveshjes, ne kemi një shans.

“Nuk është një deklaratë, ne jemi vetëm në finale. Mendoj se City e dinte që më parë se mund të ishte e vështirë kundër nesh – kështu ka qenë mes nesh shumicën e kohës.”

Skuadra e Klopp është e dyta në Premier Ligë pas Cityt dhe në Ligë të Kampionëve në gjysmë finale do të përballet me Villarrealin. City është në gjysmëfinalen tjetër kundër Real Madridit.