Trajneri i njohur i futbollit në Kosovës Ismet Munishi ka marrë duartrokitjet e shumë specialistëve dhe tifozëve për transformimin e ekipit të Ballkanit nga një ekip që luftonte sezonin e fundit për mbijetesë në pretendin kryesor për titullin kampion këtë edicion.

Tekniku karizmatik e ka komentuar ecurinë mbresëlënëse të ekipit të tij me shprehjen e famshme të trajnerit të Liverpoolit, Jurgen Klopp.

‘’E mbaj mend një deklaratë të Jurgen Klopp, kur thotë se statistikat duhet lënë për Play-Station, pra nuk kanë rëndësi”, bën me dije Munishi në emisionin ‘’Arena Sportive’’.

‘’Xhebrailat’’ janë kthyer në surprizën e këtij sezoni në IPKO Superliga duke lënë pas ekipet e suksesshme të Prishtinës, Dritës, Gjilanit e Feronikelit.

Ndryshe, Ismet Munishi në një rrëfim ekskluziv për Reporterin para disa jave ka thënë se skuadra e tij, Ballkani është magjia e futbollit kosovar dhe se luan ngjashëm si Liverpooli.