Në Ditën e Çlirimit të Kosovës, Presidentja e Shtetit, Vjosa Osmani, ka vizituar Kombëtarën e Kosovës në futboll, të cilët po ‘luftojnë’ për kualifikim në Euro 2024.

Osmani ka falënderuar përfaqësuesit e Kosovës në futboll për, siç tha ajo, nderin që po ia bëjnë sakrificës për çlirimin e vendit, njofton FFK, shkruan gazeta online Reporteri.net.

“Sot është një ditë e rëndësishme, 12 qershori, dita e lirisë sonë, ku secili prej nesh e kujton atë sakrificë. Por nuk ka krenari më të madhe se sa të shohësh secilin prej jush duke e nderuar atë sakrificë aq shumë dhe duke e nderuar Republikën dhe flamurin tonë”, ka theksuar presidentja Osmani.

Ajo i ka inkurajuar futbollistët për të dhënë më të mirën e tyre në ndeshjet e radhës, teksa ka thënë se me paraqitjet e tyre ata janë shndërruar në ambasadorë të fuqishëm të Republikës.

“Natyrisht presim fitore, por pavarësisht rezultatit jemi me juve, pasi ju jeni krenaria e vendit tonë. E di që shumë prej jush jetoni larg vendit dhe kjo tregon që pavarësisht sa larg jeni një copë Kosove e mbani me vete dhe jeni të interesuar në fuqizimin e shtetit tonë përmes sportit, e që në këtë mënyrë jeni shndërruar në ambasadorë jashtëzakonisht të fuqishëm të Kosovës. Ne bëjmë tifo për ju jo vetëm kur jeni në kombëtare, por edhe në klubet e juaja”, ka shtuar ajo. /Reporteri.net/.