Shqipëria dhe Kroacia do të zbresin mesditën e së mërkurës në fushën e Volksparkstadion të Hamburgut, për të kërkuar secila fitoren, me 3 pikëshin që do t’i mbante ende në garë për një vend në 1/8 e Euro2024.

Të dyja ekipet po përgatiten maksimalisht, por presioni duket se ka rënë mbi kroatët, të cilët pësuan një humbje tronditëse me rezultatin 3-0 përballë Spanjës.

Tekniku Zlatko Daliq pas kritikave të ashpra nga tifozët dhe opinioni sportive në Kroaci për zgjedhjet taktike që bëri ndaj iberikëve, duket se ka vendosur të surprizojë me vendimet për sfidën me Shqipërinë.

Për herë të parë në historinë e kombëtares ballkanase dhe të një kompeticioni si Europiani, Daliq ka vendosur që Kroacia të mos stërvitet në stadiumin ku do të luhet ndeshja, siç ndodh normalisht një ditë para sfidës, raporton mediumi kroat “Jutarnji”.

Trajneri kroat në stërvitjen e pasdites së djeshme, ku kishte në dispozicion 25 futbollistë pasi Nikolla Vllashiç nuk ishte në formë, ka përgatitur taktikat dhe më pas mori vendimin surprizë për të mos u nisur menjëherë drejt Hamburgut.

Modriç me shokë do të stërviten edhe sot duke nisur nga ora 11:00 në qendrën sportive të përzgjedhur nga Federata Kroate e Futbollit dhe në orën 16:00 do të udhëtojnë me autobus për në Hamburg, ku nuk do të stërviten një ditë para ndeshjes